Skondnar setningar

Konan mín er stungin af með besta vini mínum!
Ég sakna hans!

Guð blessi trúleysið!

Kristur er svarið!
Hver var annars spurningin?

Jesús lifir!!!!!
Og hann áritar biblíuna í Eymundson á þriðjudaginn!

Líkbrennsla herra Jóns Jónssonar mun eiga sér stað í
Fossvogskirkju kl.14,30
- Minnkiði logann, ég kemst ekki fyrr en klukkan 16,00

Hjálpaðu löggunni!
Lemdu þig sjálfur.

Síðasti maðurinn sem yfirgefur landið er vinsamlegast
beðinn um að slökkva á eftir sér!

Berjist gegn verðbólgu!
- Étið þá ríku

Ef maður mætti ráða hvar maður deyr, myndi ég velja Súðavík
því þar finnur maður ekki muninn.

Ég er hættur að vera montinn, ég er það fullkominn!

Ef superman er svona klár, akkuru er hann þá í nærbuxonum
utanyfir?

haldið dauðanum fjarri vegunum, keyrið á gangstéttinni!

Við erum fá eins og svo margir.

500.000.000.000 flugur geta ekki haft á röngu að standa
Étið skít!

Þú átt enga möguleika
- notaðu þá!

Uppfinningar þjóðar segja mikið um hana!
Það er heldur engin tilviljun að það var dani sem fann upp björgunarhringinn

Merkileg kona, löngu tímabær minnisvarði.

Bríet Bjarnhéðinsdóttir er ein merkasta kvenréttindakona okkar. Það er því sannarlega ánægjulegt að loksins eigi að reisa henni minnisvarða.  Hennar ber að minnast, ekki bara í orði heldur líka á borði.  Jafnrétti hefur ekki enn náðst að fullu þannig að enn er til mikils að vinna.  Launamunur kynjanna er hlutur sem ekki á að eiga sér stað í okkar þjóðfélagi. 

Minnisvarði um Bríeti mun rísa í miðborginni

Kominn tími til að stöðva stóriðjustefnuna

Það er sannarlega áhyggjuefni eigi stóriðjustefna fyrri ríkisstjórnar að halda áfram óbreytt.  Ég var að vona að með komu Samfylkingarinnar í ríkisstjórn myndi verða breytingar þarna á.  En annað hefur greinilega komið á daginn.  Fyrirhugaðar álversframkvæmdir halda áfram eins og ekkert hafi í skorist.  Miðað við stefnu stefnu ríkisstjórnarinnar að heimila að áfram sé haldið undirbúningi álverksmiðja í Helguvík, í Straumsvík, á Húsavík og víðar í skjóli útgefinna rannsóknaleyfa til orkuöflunar. 

Það er kominn tími til að stöðva þessa óráðsíu og tek ég undir orð VG um að brýnt sé  að Íslendingar móti sér vistvæna og sjálfbæra orkustefnu til langs tíma litið eins og VG hefur lengi talað fyrir og ítrekað lagt fram tillögur um, síðast í stefnuritinu Græn framtíð.

 

VG lýsir yfir áhyggjum vegna undirbúnings við álver

Svoldið of sein

Já svona getur ólánið leikið við mann.  Ég er búin að ætla að mála þakið hjá mér í allt sumar og svo sannarlega verið veður til þess En ó nei mín ekki sú skipulegasta, þannig að ég hugsaði alltaf með mér að ég gerði þetta seinna.  En svo fattaði ég að ég var ekkert sjálf að fara að mála uppi á þaki, þótt ég geti gert ýmsa hluti þá er þak eitthvað sem heillar mig ekki þannig að þá var að finna einhvern sem gæti gert þetta fyrir mig. Svo heppilega vill til að ég á voða yndælan frænda sem ætlar að gera þetta fyrir mig svo ég dreif mig i gær að kaupa málningu haldið þið ekki að þá fari bara að RIGNA ohh loksins þegar ég var bún að kaupa efnið og allt ready. Þannig að nú er bara að vona að það rigni bara stutt þannig að ég geti látið klára verkið.

Annars er búið að vera bara voða rólegt eftir að ég kom úr ferðalögunum, búin að vera að vinna svoldið, ganga, og hafa það bara voða næs

Tækifærið.....

Já nú er kannski bara komið að því að maður láti langþráðan draum rætast, hætti bara í kennslu og fari bara að syngja  Einar vinur minn hlýtur nú að ráða mig í grúbbuna.  ÉG hef talsverða reynslu úr kareoke og singstar

Emilía hættir í Nylon

Klukkuð.....

Já það var hér fyrir nokkrum dögum síðan að ég var klukkuð af Elínu vinkonu og einnig saumakonunni.  úfff þið setjið mig í algjöran bobba stelpur því það er held ég ekkert sem enginn veit um mig En reynum samt aðeins.... 8 hlutir sem aðrir vita ekki um mig....

 

1.  Ég er með skápafóbíu, þ.e á mjög erfitt með að skipuleggja þá og fæ svona hroll ef ég á að raða miklu inn í þá og skipuleggja. Var stundum sett út á mína "hæfileika" við að raða t.d fötum og í eldhússkápa af fyrrverandi sambýslismanni. En minn þröskuldur er kannski hærri en annarra við það.

2.  Ég þoli ekki ef klósettpappírsrúllan snýr öfugt á statífinu, sný henni alltaf við ef ég kem að salerni þar sem hún snýr RANGT.   Opnar skúffur og hurðir á skápum fara í taugarnar á mér, ef ég veit af opinni hurð einhver staðar í húsinu verð ég ekki rónni fyrr en ég ef bún að fara t.d fram og loka henni þótt ég sé t.d farin upp í rúm að sofa.  líka ef ég er á öðrum stað en heimili mínu og sé opna skáphurð verð ég að loka henni.....

3.  Ég fór einu sinni hringinn með fjölskyldunni minni á 30 klukkutímum og náðum samt að stoppa hér og þar, fara í sund á Egilsstöðum og gista á Höfn í Hornafirði, borða á Akureyri og víðar og sjá helling af landinu.

4.  Ég tek í nefið svona mentol snuff (við sérstök tilefni aðallega í dag en tók daglega í nefið hér í kringum 18-19 ára aldurs) Ég elska tattú og er komin með 4 tattú og þar af eitt mjög stórt. Er svoldið hæfilega wild í mér þótt ég beri það ekki utan á mér dags daglega. Samt fíla ég líka Duran Duran og Madonnu og hef alltaf gert.

5.  Mér fannst Pálmi Gunnarsson söngvari alltaf rosa flottur og sexy þegar ég var unglingur og vonaðist alltaf til að hann yrði kærasti minn þegar ég yrði eldri.

6.  Ég stunda al-anon fundi og hef fundið minn æðri mátt, það hjálpar mér rosa mikið því ég er mjög meðvirk og á erfitt með að segja nei og segja eitthvað sem gæti sært aðra.

7.  Mér finnst rosa gaman að fara í búðir og versla þá sérstaklega skó, ég á um 120 pör af skóm skv. síðustu talningu

8.  Ég á það til að vera svoldið hvatvís og stundum svoldið ofvirk, framkvæma hluti og hugsa síðan, stundum hefur það komið mér í bobba en hvað er gaman af lífinu nema að taka smá sénsa hér og þar og láta bara vaða.

 

Mig langar að klukka Sólborgu, Thelmu og hlaupagarp.

okurverð á lyfjum á Íslandi

Það er löngu tímabært að athuga lyfjaverð hér á landi.  Það er mikið okur á lyjum hérna og mál til komið að taka á því og lækka lyfjakostnað sjúklinga.  Vissulega greiðir ríkið talsvert niður af þessum kostnaði.  En á meðan þessi einokun rikir er ekki nokkur von til þess að verðið lækki eitthvað.

Vill leyfa póstverslun með lyf

Ekki er ráð nema í tíma sé tekið

Já það borgar sig að hafa vaðið fyrir neðan sig og vera búin að tryggja sér gistingu í nótt, allt fullt á hótelum og þá eru það bara fangageymslurnar sem virka.

Von á örtröð í fangageymslur lögreglu

Smá pælingar

Ég má til með að setja smá hér inn sem ég sá á síðunni hjá Elínu vinkonu.  Þetta eru mjög djúpar pælingar og ekkert smá réttar

Smá pælingar

Af hverju þarf maður alltaf að gá hvort maður geti sleikt olnbogann þó að allir vita að það er ómögulegt?

Af hverju ætli maður þurfi alltaf að gá hvort veggur sé nýmálaður, þegar maður sér viðvörun um það?

Skyldi "franskur koss" bara kallast "koss" í Frakklandi?

Hver ætli hafi verið sá fyrsti sem horfði á kú og sagði: "Ég held ég kreisti þetta dinglumdangl neðan á henni og drekki það sem út kemur"?

Af hverju límist ekki límtúpan saman?

Af hverju sér maður aldrei fyrirsögnina: "Skyggn manneskja vinnur í lottó"?

Af hverju er orðið "skammstöfun" svona langt orð?

Af hverju er hnefaleikahringurinn ferhyrndur?

Af hverju er appelsínusafi framleiddur úr gerviefnum og uppþvottalögur búinn til úr ekta sítrónum?

Af hverju er það kallað "rush-hour" einmitt þegar umferðin gengur sem hægast?

Af hverju er orðið orðabók í orðabókum?

Af hverju er ekki til kattamatur með músabragði?

Af hverju eru flugvélar ekki framleiddar úr sama efni og "svarti kassinn" sem er óbrjótandi og erfitt að eyðileggja?

Af hverju eru allar brauðristar með stillingu sem brenna brauðsneiðar í kolamola sem enginn vill borða?

Ef maður á jarðarskika, á maður hana þá alveg niður að kjarna jarðarinnar?

Af hverju geta konur ekki sett á sig maskara án þess að hafa opinn munninn?

Af hverju klæjar mann alltaf í nefið þegar maður er búinn að óhreinka hendurnar?

Af hverju er mínútan miklu lengur að líða fyrir utan klósetthurðina en innan?

Ef ástin er blind, af hverju eru sexý undirföt þá svona vinsæl?

Hvers vegna vantar okkur alltaf eitthvað af draslinu sem við geymdum uppi á lofti í 3 ár, 3 dögum eftir að við hentum því loksins?

Ef það er satt að við séum hér til að hjálpa öðrum, hvað eru þá hinir að gera hér?

Ef ólívuolía er búin til úr ólívum, hvaðan kemur þá barnaolían?

Föstudagur

Það er alltaf einhver sjarmi við föstudaga. 

Ég man þegar maður var unglingur eða svona rúmlega unglingur og var að vinna í humrinum, þá voru föstudagarnir oft  notaðir í það að fá frí eftir hádegi t.d og þá var farið með rútunni í bæinn og keypt sér föt.  Ég man þegar var verið að borga út annan hvorn föstudag, þá komu Erla og Ella niður með launaumslögin, fyrst voru peningar í umslögunum en síðar var farið að nota tæknina og leggja launin inn og þá fengum við launaseðlana.   Eftir hádegi var síðan einhver sem var orðinn 20 ára,  sendur í ákveðna búð á selfossi og suma föstudaga var innkaupalistinn ansi langur. Síðan var stefnan tekin annað hvort í Aratungu, Árnes, Njálsbúð eða Borg á sveitarball, sumar helgar var farið á tvo staði jafnvel.  Yfirleitt var farið með sætaferðum en stundum tók einhver að sér að vera "driver"  Já það var fjör í den old days. 

 Í dag er ekkert við að vera.  Á selfossi er ekki lengur neinn skemmtistaður, félagsheimilin eru hætt að hafa sveitarböll um helgar þannig að fyrir fólk hér í dag eru ansi fáir skemmtanakostir.  Þannig að þar eru breyttir tímar.  Það var oft mikið brallað á þessum árum og ýmsar hugmyndir sem komu upp og voru framkvæmdar, við vinkonurnar vorum oft ansi duglegar við að bralla eitt og annað.  Vá ég er komin í einhverja nostalgígju hér

En í dag er kominn föstudagur og nú er rútínan öðruvísi, nú snúast föstudagar um helgarinnkaup, innkaupamiðarnir ganga núna í búðir sem allir geta verslað í,  ég panta pizzu með krökkunum og við höfum  kósý stund saman.  Þetta gefur manni jafn mikið og meira ef eitthvða en hitt gaf manni hér áður.  Skondið hvað tímarnir breytast og mennirnir með.  Það er líka ótrúlegt hvað timinn er fljótur að líða án þess að maður taki nokkuð eftir því, það sem manni finns vera örstutt eru kannski 10-15 ár.

Tíminn fýgur svo sannalega áfram

knús Sædís