Frábær Alfahelgi að baki

Vá þvílík og önnur eins helgi.  Það var Alfahelgi núna um helgina og þetta var ekkert smá magnað. www.alfa.is fyrir þá sem ekki vita hvað Alfa er.  Krafturinn þarn var þvílíkur, bænasvörin og vitnisburðirnir sem fólk flutti á laugardagskvöldinu voru ótrúlegir.  Það er svo sannarlega hægt að segja að heilagur andi hafi verið þarna að verki.   Ég á eftir að lifa lengi á þessu. 

36 cm away

Jebb það eru farnir 36 sm í heildina, enda bara farið að muna smá í fatastærð, mest fór 16 cm á einum stað og svo koll af kolli.   Það kemur sér stundum vel að vera jójó og eiga nokkrar stærðir og gerðir í fataskápnum en nú vona ég og ÆTLA að halda mér í einni stærð í framtíðinni og það frekar í minni kantinum en stærri.

Sá danski ásamt boot campinu auðitað, er búinn að hjálpa mér með að ná af mér 8,8 kílóum á 7-8 vikum þannig að ég held að ég get nokkuð vel við unað, 8,8 kíló og 36 sm er bara voða gaman og ég bara rétt að byrja  og  þá er bara að halda áfram og ná meira af sér.  En það er líka voða gaman að hugsa þetta í einhverju hlutbundnu þar sem maður er nú kennari og lætur börnin vinna með hluti til að átta sig á stærð og hlutföllum.  Ef ég tæki 17 smjörlíkistykki og setti þau saman þá væri það jafnmikið og ég er búin að léttast um

 

Almenningssamgöngur í Árborg að verða að veruleika

Sú frábæra ákvörðun var tekin á bæjarráðsfundi í Árborg í morgun að koma á almenningssamgöngum innan sveitarfélagsins.  Meirihluti V, S og B lista lögðu fram þessa tillögu og var hún samþykkt með  atkvæðum meirihlutans gegn atkvæði fulltrúa meirhlutans.  Takið eftir þessu að fulltrúi Sjálfstæðisflokksins hafnar þessu að komið verði á samgöngum á milli strandarinnar og Selfoss.  Þetta var baráttumál VG fyrir síðustu kosningar og er nú að verða að veruleika um áramót, þrátt fyrir andmæli D- listans. 

Brú milli byggða - tímamót í Árborg

Á bæjarráðsfundi Árborgar í dag, 25. október,  samþykkti meirihluti bæjarstjórnar að efla almenningssamgöngur milli byggðakjarna sveitarfélagsins.  Bæjarstjóra og bæjarritara var falið að ganga til samninga við Þingvallaleið ehf um fjölgun ferða frá og með áramótum, en Þingvallaleið er með sérleyfi á þessari leið.  
Um er að ræða tímamóta ákvörðun sem vænta má að gjörbreyti búsetuskilyrðum í Árborg.  Íbúum  Eyrarbakka, Stokkseyrar og dreifbýlisins er með þessu móti gert auðveldara að sækja fjölbreytta þjónustu sem veitt er á Selfossi og íbúum Selfoss að njóta þess sem menningar- og sögustaðirnir við ströndina hafa að bjóða svo dæmi séu tekin.  Gera má ráð fyrir að þessi þjónusta hafi í för með sér miklar breytingar fyrir íbúa utan Selfoss.  T.d. fyrir börn og ungmenni sem sækja fjölbreytt íþrótta- og tómstundastarf á Selfoss og fyrir þá íbúa sem ekki hafa sjálfir bíl til umráða en sækja ýmsa þjónustu á Selfoss.  Þá eru almenningssamgöngur mikilvægur þáttur í því að draga úr umferð bifreiða og leiða þannig til minni mengunar og slits á vegum.   Þetta er mikilvægt skref í þá átt að íbúar Árborgar njóti jafnræðis hvar sem þeir búa í sveitarfélaginu og er til þess fallið að styrkja enn frekar samkennd og samstöðu innan þessa unga sveitarfélags. 

Um er að ræða tilraunaverkefni til eins árs og verður fyrirkomulag þjónustunnar kynnt vandlega þegar samningur liggur fyrir.  ( www.arborg.is)

Barnaskólinn á Eyrarbakka og Stokkseyri 155 ára

Já það var heldur betur gaman og fjör hjá okkur í BES í dag, við vorum að ljúka þemaviku sem tókst rosalega vel.  Við enduðum hana með skrúðgöngu (innandyra vegna veðurs) sýningu á afrakstri þemaviku og köku þar sem skólinn okkar er hvorki meira né minna en 155 ára í dag. 

Áfengi á ekki heima í frjálsri sölu

Ég er á móti þeirri tillögu sem nú liggur fyrir Alþingi um að gefa sölu á léttvíni og bjór frjálsa.  Ég er hissa á að heilbrigðisráðherra skuli lýsa stuðningi við þessa tillögu.  Ég tek undir orð umboðsmanns barna sem segir á www.ruv.is : Umboðsmaður barna, Margrét María Sigurðardóttir, hefur áhyggjur af frumvarpi sem heimilar sölu bjórs og léttvíns í matvöruverslunum og segir slíka breytingu stórhættulega. Hún minnir á að áfengi sé vímuefni sem hafi skaðleg áhrif á heimilum og á börn í móðurkviði. Henni finnst varhugavert að heilbrigðisráðherra skuli styðja frumvarp sem heimilar sölu bjórs og léttvíns í matvöruverslunum

Við ættum frekar að huga nánar að forvörnum og reyna að draga úr áfengisneyslu landans í stað þessa að stuðla að aukningu.  Auðvitað er það þannig að ef fólk ætlar að fá sér vín þá nær það sér í það, en að gera veikum einstaklingum það auðveldara er ekki rétt.  Mér finnst að núverandi fyrirkomulag eigi að halda sér.

Ég tel líka að það hljóti að vera mun fleiri þarfari þingmál sem háttvertir þinmenn ættu að vera að einbeita sér að heldur en að reyna að stuðla að aukinni neyslu.  Ég vona að meirihluti þingmanna verði ekki við þessari tillögu.

Helgin að baki

Þetta er búin að vera mögnuð helgi í alla staði.  Frábær samkoma í dag þar sem að tvær vinkonur mínar tóku skírn Ég fór síðan í skírn hjá sigrúnu og Jóa þar sem að Eva Björg fékk nafnið sitt.  Krakkarnir mínir fóru í skírn hjá systur sinni þannig að þá má segja að þetta hafi verið mjög blessuð helgi.  Svo næstu helgi er Alfa helgi og ég veit að hún verður fábær og það munu stórkostlegir hlutir eiga sér stað það.  Ég get bara varla beðið.  Annars var dagurinn svo magnaður í alla staði, byrjaði með frábærum fundi í morgun þar sem 9. sporið var tekið.  Það er með það spor eins og svö mörg önnur, það er svo mikil hjálp í því.   svo var það samkoma og svo skírn og veisla á eftir og svo matarboð í kvöld með frábærum vinum mínum og dætrum þeirra.

En á föstudaginn fór ég í skautaferð með 4. og 7. bekk til að fagna lokum samræmdu prófanna.  Rosa gaman og fórum svo á pizza hut á eftir.  Mín stóð sig bara eins og hetja og sveif um svellið eins og engill   Missti reyndar af bootcamp fyrir vikið og þar að auki fór danski í burtu um helgina og mín bara gleymdi öllu prógrammi  í veislunni.  Þannig að núna er það sko ekkert elsku mamma neitt, nú verður mín að taka út allt sukkið um helgina því það er víst vigtun á þriðjudaginn úff það er nú eins gott að hafa vigtina í liði með sér. En ég ætla nú ekki að fara að hafa áhyggjur af því núna.

Jæja best að fara að koma sér í svefn

góða nótt og Guð veri með ykkur

Sædís

Gegnum lífið hef ég lært

Að við getum ekki látið neinn elska okkur. Það eina sem við getum gert er að vera tilbúin að taka við ást. Afgangurinn er í guðs höndum. Að sama hve mikið við látum okkur annt um suma, þá láta þeir sig það engu varða Að það getur tekið mörg ár að byggja upp traust, en ekki nema nokkrar sekúndur að bregðast því. Að það sem skiptir máli er ekki hvað við eigum, heldur hverja við eigum að. Að það er aðeins hægt að komast takmarkað áfram á útlitinu einu saman, því þegar öllu er á botninn hvolft er það það sem er innra með okkur sem skiptir máli. Að við eigum aldrei að bera okkar eigin getu sama við það besta sem aðrir geta. Að það tekur ekki nema örskamma stund að gera hluti sem við getum átt eftir að sjá eftir það sem eftir er ævinnar. Að það mun taka okkur langan tíma að verða að þeim manneskjum sem við þráum að verða. Að við ættum alltaf, alltaf að skilja sátt við okkar nánustu, því hver veit nema þetta sé í síðasta sinn sem við hittum þá. Að við getum haldið áfram að reyna löngu eftir að okkur finnst við vera búin að gefast upp. Að við berum ábyrgð á gerðum okkar, sama hvernig líðan okkar er í það og það skiptið. Að annað hvort stjórnum við viðhorfum okkar eða við látum þau stjórna okkur. Að það hve mikla peninga við höfum er ekki ávísum á lífshamingju. Að sannir vinir eru þeir sem við getum gert allt eða ekkert með en samt notið þess að vera með þeim. Að Stundum er það einmitt sá/sú sem við bjuggumst við að myndi sparka í okkur liggjandi, sá/sú sem reisir okkur upp. Að þegar við erum illa fyrir kölluð þá erum við illa fyrir kölluð. En það gefur okkur samt ekki rétt á að vera ósanngjörn við aðra. Að þótt einhver elski okkur ekki eins og við viljum, þýðir það ekki endilega að viðkomandi elski okkur ekki af öllu hjarta. Að þroski og fjöldi afmælisdaga fara ekki endilega saman, heldur fer þroskinn eftir því sem við höfum upplifað og gengið í gegnum. Að við ættum aldrei að segja börnum okkar að draumar þeirra og vonir séu óraunhæfir. Ímyndið ykkur hve sorglegt það yrði ef þau færu að trúa því. Að sama hve góða vini við eigum, þá geta þeir líka sært okkur og þess vegna verðum við að vera tilbúin að fyrirgefa. Að lífið heldur áfram þó okkur finnist heimur okkar vera að hrynja og hjörtu okkar að bresta. Að fortíð okkar og aðstæður geta haft mikið að segja um hvaða mannsekjur við höfum að geyma i dag, en það erum samt við og aðeins við sem erum ábyrg fyrir gerðum okkar. Að þegar okkur finnst við ekki geta meira, þá eigum við inni kraft sem kemur fram þegar við þörfnumst hann mest. Megi lífið færa ykkur gelði og hamingju í hjarta. Höfundur ókunnur

Leiðréttum kjör öryrkja og aldraðra

Í gangi er undirskirftarsöfnum sem ég hvet alla til að skrifa undir.  Óréttlætið og ójöfnuðurinn í þessu þjóðfélagi er þvílíkur að það verður að fara að gera eitthvað til að sporna við honum.  Við getum verið þrýstiafl á stjórnvöld.  Nú er lag að láta Samfylkinguna standa við gefin loforð í aðdraganda kosninganna í vor.  Farið inn á þessa síðu, sendið slóðina í tölvupósti, takið þátt sýnum samhug.  Nú er komið nóg.

 http://www.petitiononline.com/lidsauki/petition.html

Aldarminning ömmu

Amma Alla hefði orðið 100 ára gömul í dag, væri hún á lífi.  Hún var fædd þann 15. okt. 1907.  Hún lést í apríl 1997.  Blessuð sé minning hennar.

Um helgina áttum við afkomendur hennar frábæra stund þar sem við komum saman til að heiðra minningu hennar.  Amma var frábær kona í alla staði.  Hún ól af sér 10 börn og komust 8 af þeim á legg og í dag eru 5 eftir af þessum hóp.

Ég þekki ekki duglegri konu en hana ömmu, hún var alltaf að, hún vann mjög mikið þegar hún hafði heilsu til og jafnvel lengur.  Ég man eftir þegar ég var lítil stelpa og var að skottast yfir til hennar og afa í Björgvin, kíkti í kjallaran hjá afa eða settist inn í eldhús eða borðstofu hjá ömmu.  Amma hafði mikla þolinmæði við að kenna mér að prjóna og oft tók hún spil við mig líka.  Ég man alltaf eftir lyktinni hjá henni, það var alltaf svo góður bökunarilmur hjá henni. Hún bakaði í mörg mörg ár flatkökur fyrir kaupfélagið hérna.  Ef hún var ekki að baka þær þá var hún að baka vinarbrauð eða aðrar kökur.  Hún var aldrei aðgerðalaus.  Mér er líka minnistæðar þær ferðir sem ég fór með henni og Nonna frænda austur að Skógum eða annað.  Amma hafði mjög gaman af því að ferðast og stundum fékk ég skottan að fara með og það var sko ekki leiðinlegt.  Mér eru líka minnistæðar ferðirnar í Hveragerði rétt fyrir jólin, þegar ég fékk að fara með henni og Nonna í jólakaupaleiðangur, þá tók ég allt klinkið mitt með mér og fór að kaupa gjafir handa mömmu og pabba, þessar ferðir voru fastur liður í kringum jólin.  Í hádeginu á sunnudögum hringdi ég oftar en ekki yfir í Björgvin til að gá hvað amma ætlaði að fara í matinn, yfirleitt leist mér nú betur á að en það sem mamma ætlaði að hafa og fékk ég þá að koma yfir að borða.  Amma var svo hjálpsöm og vildi allt fyrir alla gera, tók nærri sér ef einhver áttu um sárt að stríða.  Hún var kona með hjarta úr gulli.

Amma lifði á tímum mikilla breytinga, hún fæðist í kringum aldarmótin þarsíðustu og lifir nærri því fram á síðustu aldarmót.  það var því eðlilega mikið sem gekk á í lifi hennar, hún upplifði gleði og sorg og er ekki hægt að segja að hún hafi fæðst með silfurskeið í munni, hún þurfti alltaf að hafa mikið fyrir lífinu.  En það var gleðin sem einkenndi hana ömmu og hún var sko sannarlega rík af henni.  Gleðina smitaði hún svo sannarlega af sér því það sótti í hana fólk, allir vildu þekkja Öllu Gests.  Amma kunni ógrinni af vísum og textum og fór óspart með þær þegar hún sat með prjónana sína við borðstofuborðið og prjónaði.  Eða þá að þegar við vorum lítil átti hún það til að taka okkur í fang sér og stíga spor með okkur og syngja "óli skans"  Ég man líka alltaf að þegar hún kom út á tröppur fyrst á morgnanna þá byrjaði hún alltaf á að signa sig og fara með morgunbæn.

Það væri hægt að skrifa heila bók um þessa merku konu sem hún amma var, þeir sem þekktu hana vita hvað ég er að tala um.  Hennar er enn sárt saknað meðal okkar en við vitum að hún unir sér vel í himnaríki með afa og börnum sínum 4 sem eru farin.  Hún var orðin gömul og veik í lokin og fékk því lausn frá veikindum sínum.

Blessuð sé minning hennar ömmu sem var okkur öllum svo góð

kveðja Sædís

Mikið að gerast

Þetta er svo sannarlega búinn að vera áhugaverður dagur í íslenskum stjórnmálum.  Miklar fréttir úr höfðuborginni  Við völdum hafa tekið frábærir einstaklingar að mestu, reyndar hefði verið gott ef VG og S hefðu getað tekið þetta einir.  Ég sé fram á góða tíma í höfuðborginni þar sem þeir gefa sig út fyrir að vera félagshyggjustjórn.  Vonandi er spillingin með orkuveituna að baki og fólk getur treyst þessum meirihluta fyrir hagsmunum sínum.  Vonadi verður það bara ríkisstjórnin næst

Það gekk bara nokkuð vel hjá doktor útlenskum í dag  Ég skrifaði samviskusamlega orðalista á ensku, sat lengi með orðabókina og valdi nokkur vel völd oroð, mjög fræðileg og flott orð.  Þannig að ég mætti með blað til hans og settist fyrir framan hann og byrjaði að þylja upp sögu mína.  Gleymdi að finna rétt orð yfir heiladingul, þannig að ég benti bara á hausinn á mér og sagði "braindong" eins og einn góður samkennari minn sagði mér að gera.  Það kom nú margt og mikið út úr þessum tíma en ég þarf reyndar kannski að hringja aðeins í lækninn minn og fá nokkrar útskýringar á einu og einu hugtaki sem ég náði ekki alveg  Ekki það að enskan mín sé svona slök, heldur eru þetta svo mikið af fræðorðum.... hummm en stórfínn læknir sem gaf sér virkilega góðan tíma til að athuga alla ómögulega og mögulega þætti.

En svo var kvöldið alveg frábært, við bakkaskvísur fæddar 71, 72, 73 og 74 vorum að hittast í kvöld, frábær mæting og mikil stemming.  Frábært að hitta þær allar.

En nú ætti maður að fara að sofa

knús Sædís